LOS ANGELES – Debutimi i Shteteve të Bashkuara në Kupën e Botës 2026 kundër Paraguajit në stadiumin SoFi në Inglewood është shndërruar në një ngjarje të madhe që ka tejkaluar kufijtë e sportit, duke u kthyer në një spektakël të vërtetë me praninë e shumë figurave të njohura të Hollywoodit.

Në tribuna janë parë disa nga emrat më të njohur të industrisë së filmit dhe argëtimit amerikan, përfshirë Tom Cruise, Brad Pitt, Jamie Foxx, Paris Hilton dhe Owen Wilson.

Po ashtu, në stadium janë vërejtur edhe figura të tjera të njohura si George Lucas, Sofia Vergara dhe biznesmeni Bill Gates, duke e kthyer ndeshjen në një paradë yjesh të Hollivudit.

Stadiumi SoFi në Inglewood, me kapacitet prej rreth 70 mijë spektatorësh, ishte pothuajse i mbushur plot, ndërsa atmosfera u karakterizua nga një kombinim i sportit, spektaklit dhe kulturës pop.

Prania e figurave të famshme në një ndeshje futbolli në SHBA konsiderohet si një tregues i rritjes së interesit për Kupën e Botës në një vend ku tradicionalisht dominojnë sporte të tjera si basketbolli dhe futbolli amerikan.

Organizatorët e turneut e kanë cilësuar këtë interes si një shenjë të qartë të ndikimit global të futbollit dhe të rolit të Kupës së Botës si një event që bashkon sportin me industrinë e argëtimit dhe kulturës pop.