TIRANË – Kreu i Partisë Demokratike, Sali Berisha, ka deklaruar se çdo demokrat dhe qytetar që kundërshton qeverinë duhet të jetë pjesë e protestave që po zhvillohen në vend.

Gjatë një bashkëbisedimi me qytetarët në rrjetet sociale, Berisha e cilësoi protestën si një lëvizje “qytetare” dhe jo thjesht partiake, duke theksuar se ajo, sipas tij, përfaqëson reagimin e një pjese të gjerë të shoqërisë ndaj qeverisjes.

Ai u bëri thirrje mbështetësve të Partisë Demokratike që t’i bashkohen protestës, të cilën e përshkroi si “më qytetaren që nga viti 1990 e deri më sot”.

Duke iu referuar sloganeve që janë dëgjuar gjatë tubimeve, Berisha u shpreh se qytetarët janë të lirë të shprehen, por shtoi se përpjekjet për të ndikuar apo devijuar protestën, sipas tij, vijnë nga “vegla të qeverisë” dhe “opozita e opozitës”.

“Qytetarët janë të lirë të thonë çdo slogan që duan, por ata që përpiqen t’i manipulojnë janë mjeranë dhe vegla të qeverisë,” deklaroi ai, duke bërë thirrje që këto zëra të injorohen dhe vëmendja të përqendrohet te, siç e quajti ai, “qëllimi kryesor i lëvizjes”.

Berisha theksoi gjithashtu se protestat përfaqësojnë një reagim të gjerë qytetar dhe kërkesën për ndryshim politik në vend, duke i cilësuar ato si një nga lëvizjet më të rëndësishme opozitare të dekadave të fundit.