TIRANË – Bordi i Transparencës ka vendosur sot, më 13 qershor 2026, çmimet tavan të shitjes me pakicë dhe shumicë për nënproduktet e naftës, të cilat do të hyjnë në fuqi në orën 14:00 dhe do të mbeten në fuqi deri në mbledhjen e radhës.

Sipas vendimit, çmimi maksimal i shitjes me pakicë për gazoilin standard SSH EN 590 është përcaktuar në 183 lekë për litër, ndërsa çmimi i shitjes me shumicë në 171 lekë për litër.

Për benzinën, çmimi maksimal i shitjes me pakicë është vendosur në 170 lekë për litër, ndërsa ai i shitjes me shumicë në 158 lekë për litër.

Autoritetet kanë paralajmëruar operatorët e tregut se zbatimi i këtij vendimi është i detyrueshëm, ndërsa në rast shkeljesh do të merren masa administrative, përfshirë pezullimin e aktivitetit.

Në njoftim theksohet se Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë janë angazhuar për të garantuar mbrojtjen e konsumatorëve dhe ruajtjen e konkurrencës së ndershme në tregun e karburanteve.

Bordi sqaron gjithashtu se, bazuar në Aktin Normativ nr. 1, datë 3 prill 2026, çmimet aktuale janë nën pragjet e përcaktuara ligjore për aktivizimin e skemës së reduktimit të akcizës, ndaj do të vijojë të aplikohet niveli i plotë prej 100% të saj.

Ndërkohë, për gazoilin për peshkim, çmimi është llogaritur në 88 lekë për litër, në përputhje me legjislacionin në fuqi, i cili parashikon përjashtime nga taksat dhe akciza për anijet e peshkimit sipas kushteve të përcaktuara ligjore.

Vendimi i Bordit synon, sipas autoriteteve, të stabilizojë tregun dhe të parandalojë abuzimet me çmimet në sektorin e karburanteve.

Njoftim për Shtyp

Bordi i Transparencës në datë 13 Qershor 2026, në mbledhjen e radhës vendosi: ✅Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 183 lekë/litri, ndërsa i shitjes me shumicë jo më shumë se 171 lekë/litër. ✅Çmimi i shitjes me pakicë i nënproduktit benzinë e standardit SSH EN të jetë jo më shumë se 170 lekë/litri, ndërsa i shitjes me shumicë jo më shumë se 158 lekë/litër. 🗓️Çmimet e caktuara nga Bordi do të hynë në fuqi sot datë 13 ora 14.00 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes. ⚠️Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi. 🚫Në rast të shkeljeve të konstatuara nga operatorë të ndryshëm do të vendoset pezullimi i aktivitetit. 🛢️ Ministria e Ekonomisë dhe Inovacionit sëbashku me Ministrinë e Financave dhe Ministrinë e Infrastrukturës dhe Energjisë janë angazhuar të mbrojnë interesat e konsumatorëve shqiptarë dhe ruajtjes së parimeve të konkurrencës së ndershme në treg.

SQARIM: Referuar Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, ku është parashikuar, se në rast se çmimi i shitjes me pakicë, për gazoili është më i lartë se 220 lek/litri, apo për benzinën është më i lartë se 200 lek/litri, zbatohet niveli 80% i akcizës. Bazuar në zbatimin e metodologjisë për llogaritjen e çmimeve tavan te shitjes me pakice, çmimet janë nën kufirin e Aktit Normativ nr. 1, datë 3.4.2026, dhe për rrjedhojë niveli i akcizës do të zbatohet i plotë, 100%. Gazoili për peshkim – çmimi i shitjes së gazoilit për peshkim, referuar Ligjit 9975, datë 28.07.2008 “Për taksat Kombëtare”, ne nenin Neni 9 “Përjashtimet nga pagimi i taksave kombëtare”, pika 6 parashikohet: …“Përjashtohen nga pagimi i taksës së qarkullimit dhe taksës së karbonit anijet e peshkimit.  Gjithashtu referuar nenit 10, pika 3 germa “d” te Ligjit 61/2012 “Për akcizat në RSH” parashikohet përjashtimi nga detyrimet e akcizes i karburantit për anijet e peshkimit, në sasitë, kushtet dhe kriteret e përcaktuara në VKM. Referuar metodologjise së përcaktuar në aktin normativ, çmimi i shitjes së gazolit për peshkim rezulton 88 lekë.