Katër persona kanë rënë në prangat e Policisë së Tiranës gjatë fazës së katërt të operacionit të koduar “Zonat”, i cili synon goditjen e rrjeteve të shpërndarjes së lëndëve narkotike në kryeqytet.

Sipas Policisë, në pranga janë vënë E.S., 45 vjeç, I.D., 54 vjeç dhe F.Gj., 48 vjeç, të cilët u kapën në flagrancë në Rrugën e Kavajës me një sasi të konsiderueshme kokaine që dyshohet se e posedonin me qëllim shitjen.

Nga hetimet paraprake rezulton se tre të arrestuarit siguronin lëndë narkotike në sasi të mëdha dhe më pas e shpërndanin në doza në zona të ndryshme të Tiranës, kryesisht në “Ish-Park” dhe “Brryl”.

Po ashtu, gjatë operacionit u arrestua edhe E.D., 32 vjeç, i cili dyshohet se shiste doza kokaine në disa zona të kryeqytetit. Policia e kapi në ambientet e subjektit ku punonte, ku u gjetën doza të gatshme për shitje dhe një shumë parash që dyshohet se ishte përfituar nga aktiviteti i paligjshëm.

Në total, gjatë operacionit u sekuestruan mbi 400 gramë lëndë e dyshuar narkotike kokainë, një pjesë e së cilës ishte ndarë në më shumë se 200 doza të gatshme për tregtim. Gjithashtu, u sekuestruan dy peshore elektronike, katër telefona celularë dhe një shumë parash.

Operacioni u zhvillua nga Seksioni për Hetimin e Narkotikëve në bashkëpunim me Forcën e Posaçme “Shqiponja”, pas informacioneve të siguruara në rrugë operative. Njoftimi i plotë: Tiranë/Finalizohet faza e 4-t e operacionit të koduar “Zonat”, për goditjen e veprimtarisë kriminale të shitjes së lëndëve narkotike.

Vihen në pranga 4 shtetas që shitnin lëndë narkotike Kokainë, në zona të ndryshme në Tiranë.

Sekuestrohen mbi 400 gramë lëndë e dyshuar narkotike Kokainë (një pjesë e ndarë në mbi 200 doza), 2 peshore elektronike, shuma parash dhe 4 celularë.

Seksioni për Hetimin e Narkotikëve, si rezultat i veprimeve të shpejta hetimore dhe operacionale të kryera mbi bazën e informacioneve të siguruara në rrugë operative për raste të shitjes së Kokainës, organizoi dhe finalizoi në bashkëpunim me Forcën e Posaçme “Shqiponja”, fazën e 4-t të operacionit të koduar “Zonat”. Si rezultat, u vunë në pranga shtetasit:

-E. S., 45 vjeç, I. D., 54 vjeç dhe F. Gj., 48 vjeç, të cilët u kapën në flagrancë në Rrugën e Kavajës, me sasi të lëndës të dyshuar narkotike Kokainë, që i posedonin me qëllim shitjen. Nga hetimet dyshohet se këta shtetas, në bashkëpunim me njëri-tjetrin, siguronin lëndë narkotike në sasi të konsiderueshme dhe më pas e shitnin në doza, në zona të ndryshme të Tiranës, kryesisht në zonat e quajtura “Ish-parku” dhe “Brryli”. Në cilësinë e provës materiale u sekuestruan 350 gramë lëndë e dyshuar narkotike Kokainë dhe 2 peshore elektronike.

-E. D., 32 vjeç, i cili dyshohet se shiste doza Kokaine, në disa zona në Tiranë. Në cilësinë e provës materiale u sekuestruan një sasi lënde e dyshuar narkotike Kokainë (e ndarë në mbi 220 doza) dhe një shumë parash, që i posedonte ky shtetas, në ambientet e subjektit ku punonte.

Materialet procedurale iu referuan Prokurorisë, për veprime të mëtejshme.