SHKODËR – Prokuroria e Shkodrës ka urdhëruar ndalimin e shtetasit Sibuel Durrësi, i dyshuar për veprën penale “Vrasje me dashje”, mbetur në tentativë, pas një ngjarjeje të ndodhur më 7 qershor, ku ai dyshohet se tentoi të përplasë me automjet katër persona pas një konflikti të çastit.

Sipas organit të akuzës, i dyshuari ndodhej nën efektin e alkoolit kur, pas përplasjes verbale me disa persona, hipi në automjet dhe drejtoi mjetin në drejtim të tyre, duke rrezikuar seriozisht jetën e tyre.

Fillimisht, ngjarja ishte referuar nga policia si aksident rrugor. Megjithatë, hetimet e mëvonshme dhe analizimi i provave kanë ndryshuar rrjedhën e çështjes. Një rol të rëndësishëm në zbardhjen e rrethanave ka luajtur edhe një video e publikuar në media, e cila dokumenton momentin e incidentit dhe ka ngritur dyshime se përplasja ka qenë e qëllimshme.

Pas verifikimit të pamjeve dhe kryerjes së veprimeve të thelluara hetimore, Prokuroria e Shkodrës ka rikualifikuar ngjarjen dhe ka urdhëruar ndalimin e menjëhershëm të Sibuel Durrësit për veprën penale “Vrasje me dashje”, mbetur në tentativë.

Materialet procedurale i janë përcjellë organeve kompetente të drejtësisë, ndërsa hetimet vijojnë për të sqaruar plotësisht rrethanat e ngjarjes dhe përgjegjësitë penale të autorit të dyshuar.

Njoftim për media

Prokuroria pranë Gjykatës së Shkallës së Parë të Juridiksionit të Përgjithshëm Shkodër urdhëron ndalimin e shtetasit Sibuel Durrësi, i dyshuar për veprën penale “Vrasje me dashje”, të mbetur në tentativë. Rezulton se, ky shtetas më datë 07.06.2026, pas nje konflikt, nën efektin e pijeve alkoolike, ka tentuar të përplasë me automjet disa persona, duke ju rrezikuar jetën.

Fillimisht, nga shërbimet e policisë kjo ngjarje është raportuar si aksidentale, por pas veprimeve hetimore të thelluara dhe publikimit në media të videos së ngjarjes të dalë rishtazi, nga Prokurori është urdhëruar ndalimi i shtetasit Sibuel Durrësi, si i dyshuar për veprën penale “Vrasje me dashje”, të mbetur në tentativë.