TIRANË – Në dosjen hetimore të Prokurorisë së Posaçme ndaj Luçiano Koçekut, i konsideruar nga SPAK si një nga figurat kryesore të grupit kriminal të goditur së fundmi, përfshihet edhe dëshmia e të penduarit të drejtësisë, Erion Alibej.

Sipas materialeve hetimore, Alibej ka dhënë deklarime mbi marrëdhëniet mes Koçekut dhe biznesmenit Ilir Shtufi, duke pretenduar se dy personat kanë pasur lidhje të afërta dhe bashkëpunim në sektorin e ndërtimit.

Në dëshminë e tij, Alibej ka deklaruar se Shtufi ishte një biznesmen i njohur në fushën e ndërtimit dhe se njohja mes tyre ishte realizuar përmes Artur Koçekut. Sipas tij, në një periudhë kur Shtufi përballej me vështirësi financiare dhe detyrime të ndryshme, Koçeku i kishte ofruar mbështetje financiare në formë monetare.

Gjithashtu, dëshmitari i drejtësisë ka pretenduar se më vonë Koçeku i kishte komunikuar personalisht se po investonte në projekte ndërtimi së bashku me Shtufin, duke kontribuar me shuma të konsiderueshme parash në cash.

Sipas dosjes, organi i akuzës dyshon se të ardhurat e përfituara nga aktivitetet e paligjshme janë investuar në sektorin e ndërtimit përmes personave të tretë. SPAK referon komunikime dhe deklarime dëshmitarësh që, sipas prokurorisë, mbështesin këtë pistë hetimi.

Megjithatë, këto pretendime janë pjesë e procesit hetimor dhe mbeten për t’u provuar në gjykatë. Deri në një vendim të formës së prerë, të gjithë personat e përfshirë në hetim gëzojnë prezumimin e pafajësisë.