MALIQ, 12 qershor 2026 – Një ngjarje e rëndë është shënuar këtë të premte në fshatin Vreshtas të Maliqit, ku një 14-vjeçar ka humbur jetën në banesën e tij.

Sipas informacioneve paraprake, i mituri vuante prej kohësh nga epilepsia dhe kishte gjithashtu probleme kardiake që nga lindja.

Ka qenë nëna e tij ajo që ka kërkuar ndihmë mjekësore, por ekipet shëndetësore që mbërritën në vendngjarje e gjetën 14-vjeçarin pa shenja jete.

Në vendngjarje ndodhen edhe efektivët e policisë, të cilët po kryejnë veprimet procedurale dhe hetimore për të sqaruar rrethanat e plota të ngjarjes.

Mësohet se i mituri jetonte me nënën dhe njerkun e tij, pasi prindërit ishin të divorcuar.

Autoritetet pritet të japin detaje të mëtejshme pas përfundimit të veprimeve hetimore.