Tiranë, 12 Qershor 2026 – Ish-ministrja e Punëve të Jashtme dhe ish-deputetja e njohur e Partisë Socialiste, Arta Dade, ka refuzuar zyrtarisht ftesën e kryeministrit Edi Rama për të marrë pjesë në aktivitetin festiv të 35-vjetorit të themelimit të PS-së, i cili do të zhvillohet pasditen e sotme në sheshin “Italia”. Përmes një reagimi të ashpër për gazetën “Dita”, Dade është rreshtuar hapur në krah të protestës qytetare që po zhvillohet prej 13 ditësh në kryeqytet, duke e cilësuar aktivitetin e mazhorancës si një "anti-miting" të organizuar përmes presionit ndaj administratës.

Dade theksoi se Partia Socialiste ka lindur historikisht si një avangardë e ndryshimit dhe e zërit kritik, ndërsa situatën aktuale e përkufizoi si një "tjetërsim dhe zaptim" të vlerave të së majtës nga udhëheqja e sotme. Ajo tërhoqi një paralele historike, duke deklaruar se ajo që Sali Berisha i bëri Partisë Demokratike në vitet ’90 duke e kthyer në pronë private, po përsëritet sot simetrikisht nga Edi Rama me Partinë Socialiste.

Sipas ish-zyrtares së lartë, revolta e rinisë studentore në bulevard mbart kërkesa thellësisht sociale për barazi dhe dinjitet, duke përfaqësuar pikërisht shpirtin idealist të të majtës që qeveria e sotme e ka braktisur për t’iu përkulur korrupsionit galopant, klientelizmit dhe arrogancës së pushtetit absolut. Dade kujtoi betejat e vështira të socialistëve në vitet ’92, ’94, ’97 dhe 21 Janar përballë regjimit të Berishës, duke u shprehur se është tragjike që ai sistem nuk u shkatërrua, por u betonua nga udhëheqja aktuale e PS-së.

Në deklaratën e saj, Dade nuk kurseu as kritikata ndaj ish-kolegëve dhe ish-funksionarëve socialistë që kanë pranuar të rreshtohen sot në sheshin "Italia". Ajo e cilësoi praninë e tyre si një "rënie morale" dhe pranim për t’u përdorur si dekor dhe mburojë e korrupsionit për interesa meskine e personale. Në mbyllje të reagimit të saj, Arta Dade bëri thirrje për një shkundje të partneritetit mes politikës dhe oligarkisë, si dhe për ngritjen e një platforme të re për një të majtë të rilindur me moral, integritet dhe afër qytetarëve, duke deklaruar se "ora e këtij rikthimi ka trokitur".