Vlorë, 12 Qershor 2026 – Aksioni i gjerë i Prokurorisë së Posaçme Antikorrupsion (SPAK) dhe Policisë së Shtetit është zhvendosur edhe në jug të vendit. Që prej orës 07:00 të mëngjesit të së premtes, dy grupe të strukturave speciale kanë zbritur në terren duke ushtruar kontrolle të rrepta në disa banesa dhe objekte në qytetin e Vlorës.

Sipas informacioneve të para nga grupi hetimor, gjatë kontrolleve të kryera në ambientet e shenjestruara në Vlorë nuk janë lokalizuar personat që kërkoheshin nga autoritetet. Ndërkohë, operacioni është shtrirë me shpejtësi edhe në zonën bregdetare të Dhërmiut, ku agjentët e BKH-së dhe forcat e rendit po vijojnë kontrollet dhe verifikimet e mëtejshme në terren.

Këto kontrolle intensive dyshohet se janë në vijimësi të drejtpërdrejtë të mega-operacionit të ndërmarrë mëngjesin e sotëm, në kuadër të të cilit Gjykata e Posaçme ka lëshuar 20 masa sigurie për goditjen e një rrjeti të fuqishëm të trafikut të drogës dhe pastrimit të parave. Ndër emrat e përfshirë në këtë dosje dhe ndaj të cilëve janë lëshuar urdhër-arreste renditen edhe biznesmenë mjaft të njohur në vend, si Ilir Shtufi dhe Artur Shehu, ky i fundit me investime dhe prona të konsiderueshme pikërisht në zonën e Vlorës (Zvërnec).

Deri në këto momente, si SPAK ashtu edhe Drejtoria e Përgjithshme e Policisë së Shtetit janë treguar të rezervuara, duke mos dhënë detaje zyrtare mbi identitetet e plota të të shpallurve në kërkim apo rezultatet e kontrolleve në jug të vendit. Një njoftim zyrtar për shtyp pritet të publikohet pas përfundimit të të gjitha veprimeve operacionale në shkallë vendi.