Tiranë, 12 Qershor 2026 – Detaje të reja tronditëse kanë dalë në dritë nga hetimet për zhdukjen e 34-vjeçarit Eglant Koçi. Autori i dyshuar i ngjarjes, miku i tij i ngushtë Armand Shakaj, 41 vjeç, i cili ndodhet në arrati, dyshohet se ka përdorur një karrotrec për të transportuar drejt zonës së Ibës automjetin e tij, brenda të cilit ndodhej trupi i pajetë i viktimës.

Sipas grupit hetimor, kjo manovër është kryer më 6 qershor me qëllim shmangien e kontrolleve rutinë të policisë rrugore. Nga këqyrja e kamerave të sigurisë, ekspertët dyshojnë se trupi i Koçit është mbajtur brenda në makinë për rreth 36 orë, pasi kontaktet e tij të fundit me familjarët datojnë më 4 qershor.

Policia ka identifikuar dhe marrë në pyetje drejtuesin e karrotrecit. Në dëshminë e tij, ai ka deklaruar se nuk kishte asnjë dijeni për krimin, duke sqaruar se Shakaj e kishte kontraktuar me pretendimin se makina kishte pësuar një defekt teknik dhe duhej dërguar pranë një servisi në zonën e Ibës.

Paralelisht, ekspertët e kriminalistikës kanë kryer kontrolle të imtësishme në ambientet e zyrës ku dyshohet se është mbajtur peng apo është vrarë 34-vjeçari, ku kanë konstatuar gjurmë mbetjesh baruti. Këto mostra janë dërguar për ekspertizë laboratorike për të vërtetuar llojin e armës së përdorur.

Aktualisht, operacioni i Policisë së Shtetit është shtrirë në dy fronte kryesore: kërkimet intensive në terren për gjetjen e trupit të Eglant Koçit në akset Tiranë-Elbasan-Librazhd, si dhe lokalizimi i Armand Shakajt. Burime nga policia bëjnë me dije se ky i fundit po përdor metoda të sofistikuara për t’i shpëtuar drejtësisë, duke ndërruar të paktën gjashtë numra telefoni gjatë ditëve të fundit për të shmangur gjurmimin e qelizave celulare.