TIRANË, 12 Qershor 2026 – Ministria e Financave ka publikuar një udhëzim të ri për bastet sportive online, i cili ndalon pagesat me para në dorë dhe vendos që çdo depozitë dhe tërheqje të kryhet vetëm përmes agjentëve financiarë të licencuar nga Banka e Shqipërisë.

Sipas udhëzimit, çdo transaksion duhet të jetë i identifikueshëm dhe i gjurmueshëm në sistemet e organizatorit, të agjentit financiar dhe në Sistemin Qendror të Monitorimit Online. Fondet e lojtarëve do të mbahen në llogari të veçanta pranë agjentëve financiarë të autorizuar për shërbime bankare ose pagesash.

Organizatorët janë të detyruar të verifikojnë identitetin e lojtarëve përpara përdorimit të llogarive të lojës dhe të sigurojnë që mjeti i përdorur për pagesa të përkasë të njëjtit person. Çdo mospërputhje identiteti do të çojë në refuzimin e transaksionit dhe kthimin e shumës te mjeti origjinal i pagesës.

Depozitimet dhe tërheqjet do të kryhen vetëm me mjete pagese në emër të lojtarit, përfshirë llogari bankare, karta apo portofol elektronik. Udhëzimi ndalon kreditimin e fitimeve në llogari të palëve të treta ose në mjete pagese që nuk i përkasin lojtarit.

Gjithashtu, organizatorët duhet të identifikojnë dhe raportojnë transaksionet e dyshimta pranë Agjencisë së Inteligjencës Financiare dhe të ndjekin rregullat për parandalimin e pastrimit të parave dhe financimit të terrorizmit. Fondet promocionale duhet të mbahen të ndara nga fondet reale deri në plotësimin e kushteve të përdorimit.

Udhëzimi parashikon rakordim ditor të llogarive të lojtarëve, lidhje të vazhdueshme me Sistemin Qendror të Monitorimit Online, dhe raportim mujor pranë AMLF-së me të dhëna mbi depozitat, tërheqjet, fitimet, numrin e lojtarëve aktivë dhe transaksionet mbi 1 milion lekë.

Gjithashtu, ankesat e lojtarëve duhet të trajtohen jo më vonë se 30 ditë kalendarike nga paraqitja e tyre, ndërsa të gjitha të dhënat e transaksioneve duhet të ruhen për të paktën pesë vjet. Udhëzimi do të hyjë në fuqi pas 15 ditësh.