Mexico City – Kupa e Botës 2026 është hapur zyrtarisht me një ceremoni madhështore në stadiumin legjendar “Estadio Azteca”, duke shënuar fillimin e edicionit të 23-të të turneut më të madh të futbollit botëror.

Ky është Botërori i parë në histori që zhvillohet me pjesëmarrjen e 48 kombëtareve dhe organizohet nga tre vende njëherësh: Meksika, Shtetet e Bashkuara të Amerikës dhe Kanadaja.

Ceremonia e hapjes u shoqërua me mesazhin simbolik “Futbolli bashkon! Mirë se vini në Meksikë”, ndërsa atmosfera u ndez nga performanca e grupit të njohur meksikan “Maná”, i cili elektrizoi stadiumin me mijëra tifozë të pranishëm.

Më pas, në fushë zbritën futbollistët e përfaqësueses së Meksikës, të cilët do të përballen në ndeshjen hapëse të turneut ndaj Afrikës së Jugut. Sfida rikthen kujtimet e Botërorit 2010, kur të dy kombëtaret u përballën gjithashtu në ndeshjen hapëse në Johanesburg.

Edhe pse Italia nuk është pjesë e këtij edicioni, ceremonia e hapjes ka pasur një prani simbolike italiane, me tenorin Andrea Bocelli që interpretoi himnin zyrtar të turneut “DNA”, së bashku me artistë ndërkombëtarë si David Guetta dhe Megan Thee Stallion, gjatë koncertit “FIFA Countdown” në Mexico City.

Organizimi artistik i ceremonisë është realizuar nga kompania italiane “Balich Wonder Studio”, e udhëhequr nga Marco Balich, e njohur për realizimin e ceremonive olimpike dhe eventeve të mëdha sportive ndërkombëtare.

Me këtë spektakël hapjeje dhe ndeshjen inauguruese Meksikë–Afrika e Jugut, nis zyrtarisht një muaj futbolli që pritet të sjellë emocione, surpriza dhe një kapitull të ri në historinë e kompeticionit më prestigjioz në futbollin botëror.