Trump tërhiqet nga kërcënimi për sulme të reja ndaj Iranit: “Ka përparim në negociata”

Presidenti amerikan, Donald Trump, deklaroi të enjten se ka anuluar planet për sulme të reja ushtarake ndaj Iranit, vetëm pak orë pasi kishte paralajmëruar se SHBA do ta godiste Republikën Islamike “shumë fort sonte” dhe do të merrte kontrollin e industrisë së saj të naftës dhe gazit.

Në një postim në rrjetet sociale, Trump tha se vendimi erdhi pas zhvillimeve pozitive në bisedimet me udhëheqjen iraniane. Sipas tij, çështjet kryesore të negociatave janë ngritur në nivelin më të lartë të udhëheqjes së Iranit dhe kanë marrë miratim, duke lënë të kuptohet se palët po afrohen drejt një marrëveshjeje.

Njoftimi vjen pas disa ditësh tensionesh të larta, gjatë të cilave SHBA-ja dhe Irani shkëmbyen sulme të kufizuara ushtarake, duke rritur frikën për një rikthim të konfliktit në shkallë të gjerë në Lindjen e Mesme.

Më herët gjatë ditës, Trump kishte paralajmëruar përshkallëzim të mëtejshëm të situatës, duke deklaruar se Shtetet e Bashkuara do ta godisnin Iranin “SHUMË FORTË SONTE” dhe do të merrnin “kontroll të plotë” mbi industrinë e tij energjetike. Megjithatë, disa orë më vonë ai ndryshoi qëndrim, duke theksuar se janë bërë hapa përpara në negociata.

Presidenti amerikan tha se diskutimet dhe pikat përfundimtare të marrëveshjes, si në aspektin konceptual ashtu edhe në detajet kryesore, janë miratuar nga SHBA-ja, Izraeli dhe aleatë të tjerë rajonalë, pa dhënë më shumë hollësi.

Megjithatë, nuk ka pasur reagim të menjëhershëm nga autoritetet iraniane apo ndërmjetësit e përfshirë në procesin diplomatik.

Bisedimet kanë ngecur prej kohësh për shkak të programit bërthamor iranian, të cilin SHBA-ja dhe Izraeli e konsiderojnë një kërcënim potencial për zhvillimin e armëve atomike. Teherani, nga ana tjetër, këmbëngul se programi i tij ka qëllime ekskluzivisht paqësore.

Një tjetër pikë e rëndësishme mosmarrëveshjeje mbetet kontrolli i Ngushtica e Hormuzit, një nga korridoret më strategjike në botë për transportin e naftës dhe gazit natyror.