Gjykata e Tiranës ka vendosur masën e sigurisë “arrest në burg” për Fabian Zakon, Kristaq Bibën, Elsaed Maqinajn dhe Marsel Varkën, të arrestuar në kuadër të operacionit policor të koduar “Rrjeti”, i zhvilluar kundër trafikut dhe shitjes së armëve të zjarrit.

Sipas hetimeve, katër të arrestuarit dyshohen se ishin pjesë e një grupi kriminal që merrej me tregtimin e armëve të zjarrit, lëndëve plasëse dhe municioneve luftarake në zona të ndryshme të Tiranës.

Ndërkohë, autoritetet kanë shpallur në kërkim edhe dy persona të tjerë të dyshuar si pjesë e grupit, Kevin Vila dhe Bledar Avdillari, për të cilët vijojnë kërkimet.

Gjatë operacionit, forcat e policisë sekuestruan katër pistoleta dhe tre armë automatike tip kallashnikov, me vlerë që varionte nga 1.500 deri në 2.500 euro në tregun ilegal. Po ashtu, u sekuestruan telefona celularë, municione dhe prova të tjera materiale që pritet të ndihmojnë në thellimin e hetimeve.

Sipas Policisë së Shtetit, operacioni “Rrjeti” është vazhdim i një serie hetimesh të mëparshme, të cilat kanë çuar në goditjen e të njëjtit grup kriminal. Në kuadër të këtyre hetimeve janë arrestuar më herët edhe Donati Jaku, Urim Meta, Klodian Mustafa, Ligor Mehmeti dhe Florian Gjeta.

Bilanci i përgjithshëm i operacionit dhe hetimeve të lidhura me këtë grup kriminal ka çuar deri më tani në arrestimin e nëntë personave. Gjatë kësaj periudhe janë sekuestruar 17 armë zjarri, katër kallëpe tritoli, katër automjete, një sasi e konsiderueshme municionesh dhe 13 telefona celularë.

Sipas hetuesve, zonat e Alliasit dhe Freskut në Tiranë kanë qenë ndër pikat kryesore ku zhvillohej aktiviteti i dyshuar kriminal i grupit, përfshirë shitjen dhe shpërndarjen e armëve.