Kreu i Grupit Parlamentar të Partisë Socialiste, Taulant Balla, ka komentuar deklaratat e fundit të ish-ministres Elisa Spiropali, e cila ditë më parë kërkoi një “marrëveshje të re për Shqipërinë” dhe adresoi kritika ndaj funksionimit të pushtetit. I pyetur nga gazetarët në hollin e Kuvendit, Balla u tregua i rezervuar duke vënë në dukje se qëndrime të tilla duhet të diskutohen fillimisht brenda strukturave të brendshme të forcës politike.

Balla deklaroi se nuk i ndjek postimet e çdo deputeti në rrjetet sociale, ndërsa zbuloi se kolegja Spiropali nuk ka qenë e pranishme në mbledhjen e fundit të grupit parlamentar për t’i ngritur këto shqetësime. “Kushdo që ka një shqetësim, sapo kam filluar një mbledhje grupi, nuk ishte fare. Kur të vijë, le ta thotë aty, do e dëgjoj me vëmendje. Kam një komunikim shumë të mirë me të gjithë deputetët, përfshirë edhe me kolegen Spiropali”, u shpreh ai.

Lidhur me protestat masive që po zhvillohen prej 11 ditësh në kryeqytet, kreu i grupit socialist theksoi se mungesa e një përfaqësie zyrtare nga ana e tubuesve e bën të vështirë trajtimin e kërkesave konkrete. Ai nënvizoi se maxhoranca aktuale ka një mandat legjitim prej 850 mijë votash dhe një kontratë të qartë me shqiptarët, duke shtuar se vendi nuk ka kohë për të humbur në rrugëtimin e tij zhvillimor.

Në mbyllje të prononcimit të tij, Balla u ndal edhe te Samiti i NATO-s që do të organizohet vitin e ardhshëm në Tiranë, duke konfirmuar se Presidenti i SHBA-së, Donald Trump, do të jetë i mirëpritur në Shqipëri në kuadër të këtij aktiviteti të madh ndërkombëtar. Ndër të tjera, ai dënoi çdo thirrje me karakter diskriminues apo antisemitik që mund të jetë shfaqur gjatë tubimeve, duke përsëritur se komentet e plota mbi platformën e protestës do të bëhen vetëm kur ajo të ketë një grup përfaqësuesish të zyrtarizuar.