Dëshmia e shtetasit Aleksandër Kola, i cili punonte si çoban në fshatin Bode, është kthyer në një nga provat më të forta të grupit hetimor në procesin e hapur ndaj shtetasit Violand Braçellari. Para oficerëve të policisë gjyqësore, Kola ka zbardhur të gjithë dinamikën e jetesës në stanin e Braçellarit, duke treguar për praninë e armëve të zjarrit dhe sjelljen e dyshimtë të pronarit përpara arrestimit.

Sipas procesverbalit të deklarimit, dëshmitari ka shpjeguar se kishte nisur punë në mesin e muajit maj të këtij viti, pasi Braçellari i kishte premtuar një pagë mujore mjaft të lartë, prej rreth 1200 eurosh. Kola ka pohuar se gjatë qëndrimit disa javor në këtë zonë, ka vënë re se pronari i stanit lëvizte i armatosur në mënyrë të vazhdueshme, duke mbajtur me vete një automatik kallashnikov dhe një armë gjahu çifte, si dhe shfaqte shenja të forta paranoje ndaj pranisë së personave të tjerë.

Sipas dëshmisë, Braçellari largohej me shpejtësi drejt zonës pyllëzuar të malit sa herë që merrte sinjalizime në telefon për lëvizje të dyshimta ose të panjohura. Çobani ka sjellë në vëmendje një episod të ndodhur disa ditë para ngjarjes kryesore, ku i dyshuari ishte fshehur në pyll me armë në dorë menjëherë pasi ishte njoftuar se drejt stanit po ngjiteshin disa automjete të huaja.

Situata mes tyre ka agravuar rëndë më 3 qershor 2026. Kola ka deklaruar se i ka kërkuar pronarit leje për t’u larguar disa ditë pranë familjes për shkak të gjendjes së rënduar shëndetësore të nënës së tij, por ky pranim është refuzuar prerazi nga Braçellari. Debati mes të dyve ka degjeneruar në fyerje dhe dhunë fizike, ku sipas dëshmitarit, Braçellari i ka drejtuar armën e zjarrit duke e kërcënuar seriozisht për jetën. Pas këtij momenti, çobani është larguar i tmerruar nga stani dhe ka depozituar një kallëzim penal në polici, veprim ky që shërbeu si pikënisje për organizimin e operacionit të suksesshëm për kapjen e Violand Braçellarit.