Ish-deputeti i Partisë Demokratike, Ervin Salianji, ka reaguar përmes rrjeteve sociale lidhur me protestat masive që po zhvillohen përpara kryeministrisë. Salianji ka publikuar një video-mesazh ku shihet një pjesë nga fjalimi i kryeministrit Edi Rama në Kuvend, gjatë të cilit kreu i qeverisë shprehte bindjen se qytetarët shqiptarë nuk do të ngriheshin në protesta masive.

Sipas Salianjit, pamjet e bulevardit të mbushur plot përgjatë 11 ditëve të fundit janë përgjigjja më e mirë ndaj asaj që ai e cilëson si arrogancë dhe prepotencë të pushtetit. Ai theksoi se qytetarët kanë zbritur në shesh për të kërkuar largimin e një qeverisjeje të përfshirë nga korrupsioni, e cila, sipas tij, punon vetëm për interesat e një grushti njerëzish.

“Qytetarët shqiptarë tha nuk ngrihen dot. Doli u tall me prepotencë e arrogancë, me një qeverisje të kalbur me korrupsion që u shërben një grushti njerëzish. Shihni sheshin dhe se si qytetarët e bënë të ndjejë thellë protestën e qytetarëve e të mos dinë ku të futen”, ka deklaruar Salianji në reagimin e tij, duke vënë në dukje rritjen e presionit publik ndaj ekzekutivit.