Pesë oficerë policie u vranë dhe disa të tjerë mbetën të plagosur pas një sulmi të armatosur në shtetin perëndimor të Michoacanit, në Meksikë, vetëm pak orë përpara nisjes së Kupës së Botës.

Ngjarja ka rikthyer në vëmendje sfidat e sigurisë me të cilat përballet vendi, ndërsa përgatitet të mirëpresë një nga ngjarjet më të mëdha sportive në botë.

Sipas autoriteteve lokale, automjeti me të cilin udhëtonin efektivët e policisë u qëllua me breshëri plumbash në komunën e Nahuatzenit, një zonë ku vepron karteli i fuqishëm i drogës Jalisco New Generation (CJNG). Pamjet e publikuara nga mediat ndërkombëtare tregojnë automjetin e dëmtuar rëndë pas sulmit.

Departamenti i Sigurisë së Michoacanit njoftoi nisjen e një operacioni të gjerë policor për identifikimin dhe arrestimin e autorëve, ndërsa hetimet për zbardhjen e plotë të ngjarjes vijojnë.

Michoacani konsiderohet një nga rajonet më problematike të Meksikës për shkak të aktivitetit të grupeve kriminale. Shteti është i njohur për prodhimin e avokados dhe agrumeve, por njëkohësisht përballet me fenomene si zhvatja, trafiku i drogës dhe rekrutimi i detyruar i të rinjve nga kartelet.

Ngjarja ndodh në një moment delikat për Meksikën, pasi sonte nis zyrtarisht Kupa e Botës në stadiumin Azteca në Mexico City. Kryeqendra e Michoacanit, Morelia, ndodhet rreth 300 kilometra larg qyteteve pritëse të turneut.

Pas një serie ngjarjesh të dhunshme, përfshirë vrasjen e kryebashkiakut të Uruapanit dhe kreut të një shoqate prodhuesish agrumesh vitin e kaluar, autoritetet federale kanë dislokuar rreth 12 mijë ushtarë në Michoacan për të forcuar sigurinë dhe për të luftuar aktivitetin e karteleve kriminale.