TIRANË – Pas përfundimit të fjalimeve dhe adresimeve publike para Kryeministrisë, protestuesit kanë nisur marshimin në rrugët kryesore të kryeqytetit, duke vijuar aktivitetin e tyre qytetar për të 11-ën ditë radhazi.

Nën thirrjet dhe sloganet e protestës, pjesëmarrësit u shpërndanë në formë marshimi në disa akse të Tiranës, ndërsa përcollën mesazhe për vijimin e mobilizimit edhe në ditët në vijim.

Gjatë mbylljes së tubimit, protestuesit përsëritën moton “Nesër më shumë”, duke theksuar se synojnë të zgjerojnë pjesëmarrjen dhe angazhimin qytetar në protestat e ardhshme.

Tubimi i kësaj mbrëmjeje u karakterizua nga pjesëmarrja e qytetarëve të grupmoshave të ndryshme, aktivistëve dhe përfaqësuesve të shoqërisë civile, të cilët kërkojnë anulimin e projektit të Zvërnecit dhe dorëheqjen e kryeministrit Edi Rama.

Organizatorët kanë bërë të ditur se protestat do të vijojnë edhe në ditët në vijim, ndërsa kanë ftuar qytetarët t’u bashkohen tubimeve të ardhshme.