TIRANË – Qytetarët e mbledhur në sheshin “Skënderbej” kanë nisur marshimin drejt Kryeministrisë, në kuadër të protestës që po zhvillohet prej 11 ditësh radhazi. Protestuesit kërkojnë dorëheqjen e kryeministrit Edi Rama dhe anulimin e projektit të Zvërnecit.

Protesta e kësaj të marte, 10 qershor, është thirrur si një tubim mbarëkombëtar, me pjesëmarrjen e qytetarëve dhe aktivistëve nga zona të ndryshme të vendit. Gjatë marshimit, pjesëmarrësit kanë shpalosur pankarta dhe flamuj kombëtarë, ndërsa kanë përcjellë mesazhe kundër politikave të qeverisë.

Në protestë ishte i pranishëm edhe reperi Arkimed Lushaj, i njohur për publikun me emrin artistik Stresi, i cili iu bashkua qytetarëve në tubim.

Organizatorët e protestës e kanë cilësuar mobilizimin si një nga tubimet më të mëdha qytetare të ditëve të fundit, duke theksuar se pjesëmarrësit do të vijojnë qëndresën e tyre deri në plotësimin e kërkesave të paraqitura ndaj institucioneve shtetërore.