LEZHË – Një shpërthim i dyshuar me lëndë plasëse është regjistruar në orët e para të mëngjesit në fshatin Balldren i Vjetër, ndërsa autoritetet kanë nisur hetimet për zbardhjen e plotë të ngjarjes.

Sipas informacioneve zyrtare, rreth orës 09:55 shërbimet e Policisë janë njoftuar se në një terren të hapur në Balldren i Vjetër kishte ndodhur një shpërthim, i dyshuar të jetë shkaktuar nga një sasi lënde plasëse. Fatmirësisht, nga ngjarja nuk janë raportuar persona të lënduar dhe as dëme materiale.

Menjëherë pas marrjes së njoftimit, në vendngjarje kanë mbërritur forcat e Policisë dhe grupi hetimor, të cilët kanë kryer këqyrjen e zonës dhe veprimet e para procedurale për mbledhjen e provave.

Burime hetimore bëjnë me dije se në kuadër të verifikimeve është shoqëruar një shtetas i dyshuar, ndërsa po kryhen veprime të mëtejshme për të sqaruar rrethanat, motivet dhe personat e përfshirë në këtë rast.

Nën drejtimin e Prokurorisë, hetimet vijojnë për dokumentimin e plotë ligjor të ngjarjes, si dhe për identifikimin dhe vënien përpara përgjegjësisë të autorëve të mundshëm. Autoritetet nuk kanë bërë ende publike detaje të tjera mbi natyrën e lëndës së dyshuar plasëse apo objektivin e mundshëm të saj.

Njoftimi i policisë:

Rreth orës 09:55, jemi njoftuar se në fshatin Balldren i Vjetër, Lezhë, në një terren të hapur në orët e para të mëngjesit ka shpërthyer një sasi e dyshuar lënde plasëse, pa shkaktuar dëme në njerëz apo dëme materiale.

Menjëherë pas njoftimit, në vendngjarje kanë shkuar shërbimet e Policisë dhe grupi hetimor, të cilët kanë kryer veprimet e para hetimore.

Në lidhje me këtë ngjarje, është shoqëruar 1 shtetas i dyshuar dhe po kryhen veprime të mëtejshme për sqarimin e rrethanave.

Në drejtimin e Prokurorisë, vijojnë veprimet hetimore për dokumentimin ligjor të të ngjarjes, si dhe për identifikimin dhe kapjen e autorëve.