SHËNGJIN – Një ngjarje e rëndë është regjistruar mbrëmjen e sotme në zonën e Kunes në Shëngjin, ku një person ka mbetur i plagosur me armë zjarri pas një konflikti që dyshohet se ka nisur brenda një lokali.

Sipas informacioneve paraprake, konflikti mes disa personave ka degjeneruar fillimisht në përplasje verbale dhe më pas ka eskaluar në përdorimin e armëve të zjarrit. Gjatë të shtënave ka mbetur i plagosur Kristjan Gjoni, i cili ka marrë plagë në këmbë.

Menjëherë pas ngjarjes, 35-vjeçari është transportuar me urgjencë drejt spitalit për të marrë ndihmën e nevojshme mjekësore. Burime paraprake bëjnë me dije se ai ndodhet nën kujdesin e mjekëve, ndërsa pritet një informacion zyrtar mbi gjendjen e tij shëndetësore.

Në vendngjarje kanë mbërritur forca të shumta të Policisë, të cilat kanë rrethuar perimetrin dhe kanë nisur veprimet hetimore. Oficerët kanë sekuestruar prova materiale dhe po marrin në pyetje persona që mund të kenë dijeni për rrethanat e incidentit.

Burime nga grupi hetimor bëjnë me dije se po verifikohen pamjet e kamerave të sigurisë së bizneseve përreth, me qëllim identifikimin e autorit ose autorëve të përfshirë në ngjarje dhe zbardhjen e plotë të motiveve që çuan në përdorimin e armës së zjarrit.

Hetimet vijojnë, ndërsa Policia pritet të dalë me një njoftim zyrtar për detaje të mëtejshme lidhur me këtë ngjarje që ka tronditur zonën turistike të Shëngjinit.

Shëngjin – Lezhë / Informacione paraprake

Rreth orës 10:45, në një kompleks në Shëngjin, në rrethana ende të paqarta, është plagosur me armë zjarri në këmbë shtetasi K. Gj., rreth 35 vjeç. I dëmtuari është transportuar për ndihmë mjekësore dhe ndodhet jashtë rrezikut për jetën.

Nga veprimet e shpejta hetimore janë identifikuar dy shtetas të dyshuar si autorë të ngjarjes dhe vijon puna për kapjen e tyre.

Grupi hetimor ndodhet në vendngjarje dhe po vijon punën për sqarimin e plotë të rrethanave. – Rreth orës 09:55, jemi njoftuar se në fshatin Balldren i Vjetër, Lezhë, në një terren të hapur në orët e para të mëngjesit ka shpërthyer një sasi e dyshuar lënde plasëse, pa shkaktuar dëme në njerëz apo dëme materiale.

Menjëherë pas njoftimit, në vendngjarje kanë shkuar shërbimet e Policisë dhe grupi hetimor, të cilët kanë kryer veprimet e para hetimore.

Në lidhje me këtë ngjarje, është shoqëruar 1 shtetas i dyshuar dhe po kryhen veprime të mëtejshme për sqarimin e rrethanave.

Në drejtimin e Prokurorisë, vijojnë veprimet hetimore për dokumentimin ligjor të të dy ngjarjeve, si dhe për identifikimin dhe kapjen e autorëve.