Belfast – Situatë e tensionuar është raportuar në Irlandën e Veriut, ku një sulm me thikë ka shkaktuar reagime të dhunshme në disa zona të Belfastit dhe qytete të tjera, duke çuar në zjarrvënie, përplasje me policinë dhe sulme ndaj banesave ku jetojnë emigrantë.

Ngjarjet u zhvilluan disa orë pasi një 30-vjeçar, me origjinë nga Sudani, u akuzua për tentativë vrasjeje, pasi dyshohet se sulmoi me thikë një burrë. Ai përballet gjithashtu me akuza për mbajtje të një arme të mprehtë në publik dhe kërcënime me vdekje, ndërsa pritet të dalë në gjykatë.

Pas incidentit, qindra persona dolën në rrugët e Belfastit në protesta që, sipas autoriteteve dhe mediave lokale, u përshkallëzuan në akte dhune. Protestues të maskuar i vunë flakën një autobusi, automjeteve dhe kazanëve të mbeturinave, ndërsa disa banesa ku strehohen emigrantë u shënjestruan dhe u dogjën pjesërisht ose plotësisht.

Sipas raportimeve, në disa zona të qytetit lindor të Belfastit, grupe të mëdha protestuesish kanë thyer dyer dhe dritare të banesave, duke shkaktuar evakuimin e familjeve që jetonin në to. Policia ka ndërhyrë për të shpërndarë turmat, ndërsa janë regjistruar edhe përplasje dhe sulme ndaj mjeteve të forcave të rendit.

Udhëheqës politikë në Irlandën e Veriut kanë dënuar ashpër ngjarjet, duke i cilësuar si akte dhune me motive raciste dhe kanë bërë thirrje për qetësi dhe vetëpërmbajtje.

Pamje të publikuara në rrjete sociale tregojnë protesta të dhunshme dhe zjarrvënie në disa lagje, ndërsa sipas mediave britanike, në disa raste grupe prej rreth 100 personash të maskuar kanë vepruar në mënyrë të organizuar në rrugë.

Autoritetet po vijojnë hetimet për të përcaktuar rrethanat e plota të ngjarjeve dhe për të vlerësuar nëse incidenti fillestar ka pasur lidhje me motive terroriste apo krime të tjera. Ndërkohë, situata në disa zona mbetet nën monitorim të shtuar policor.