FIER – Kryeministri dhe njëherazi kryetari i Partisë Socialiste, Edi Rama, ka komentuar protestat kundër projektit të investimit në Zvërnec, duke deklaruar se debati publik mbi këtë çështje duhet të marrë fund deri më 12 qershor.

Gjatë një takimi në Fier, në kuadër të turit për 35-vjetorin e themelimit të Partisë Socialiste, Rama u ndal te protestat e zhvilluara para Kryeministrisë, ku qytetarë dhe aktivistë kanë kërkuar anulimin e projektit të parashikuar në zonën e Zvërnecit.

Kreu i qeverisë tha se një pjesë e protestuesve janë ndikuar nga narrativa të pasakta dhe manipulime politike, duke theksuar se kundërshtimet duhet të fokusohen te shqetësimet konkrete dhe jo të përdoren për kërkesa politike që lidhen me largimin e qeverisë.

Sipas Ramës, çështje të tilla si mbrojtja e mjedisit, zhvillimi i projekteve turistike apo ruajtja e biodiversitetit duhet të debatohen mbi bazën e fakteve dhe argumenteve, ndërsa ai kundërshtoi atë që e cilësoi si përzierje të ambientalizmit me retorikën politike.

Kryeministri theksoi se deri më 12 qershor duhet të bëhet dallimi mes ambientalizmit të mirëfilltë dhe, sipas tij, informacionit të rremë që po qarkullon lidhur me projektin në Zvërnec.

“Është mirë që deri më 12 qershor të mbyllet kjo bisedë dhe të ndahet ambientalizmi nga informacionet e pavërteta”, deklaroi Rama.

Data 12 qershor përkon me festimet e 35-vjetorit të Partisë Socialiste, ku pritet pjesëmarrja e strukturave dhe mbështetësve të kësaj force politike nga i gjithë vendi.

Deklaratat e kryeministrit kanë ngjallur diskutime mbi domethënien e afatit të përmendur prej tij, ndërsa mbetet e paqartë nëse qeveria pritet të ndërmarrë hapa konkretë lidhur me projektin në Zvërnec apo me procesin e konsultimit publik për këtë investim.