Forcat e Komandës Qendrore të Shteteve të Bashkuara (CENTCOM) kanë ndërmarrë një valë të re sulmesh ndaj objektivave ushtarake në jug të Iranit, në një zhvillim që shënon një tjetër përshkallëzim të tensioneve mes Uashingtonit dhe Teheranit.

Sipas raportimeve mediatike, operacionet amerikane janë kryer me urdhër të presidentit amerikan, Donald Trump, dhe kanë pasur në shënjestër bazat detare iraniane në Sirik dhe Jask, si dhe bateritë raketore bregdetare në Minab dhe në ishullin Qeshm, i cili ndodhet në Ngushticën strategjike të Hormuzit.

Në përgjigje të sulmeve amerikane, Irani ka lëshuar të paktën katër raketa balistike dhe disa dronë drejt bazave ushtarake amerikane në Bahrein, Kuvajt dhe Jordani.

Agjencia iraniane e lajmeve “Mehr” raportoi se Trupat e Gardës Revolucionare Islamike kanë goditur bazën ajrore Muwaffaq Salti në Azraq të Jordanisë, duke përdorur raketa me rreze të gjatë veprimi. Sipas të njëjtit burim, objektivat e sulmuara përfshinin hangarë të avionëve luftarakë F-35 dhe një qendër komanduese e kontrolli.

Nga ana tjetër, autoritetet jordaneze kanë deklaruar se sistemet e mbrojtjes ajrore kanë interceptuar pesë raketa të lëshuara nga Irani në zonën e Azraq gjatë orëve të natës. Një zëdhënës i Forcave të Armatosura të Jordanisë, i cituar nga agjencia shtetërore “Petra”, bëri të ditur se nuk janë raportuar viktima apo dëme të konsiderueshme.

Ndërkohë, ushtria e Kuvajtit njoftoi se sistemet e saj të mbrojtjes ajrore kanë ndërhyrë për të neutralizuar “objektiva ajrore armiqësore”, duke vepruar sipas procedurave operative të sigurisë.

Situata në rajon mbetet e tensionuar, ndërsa palët vijojnë shkëmbimin e sulmeve ushtarake, duke rritur shqetësimet për një përshkallëzim më të gjerë të konfliktit në Lindjen e Mesme.