Të enjten e kaluar 4 qershor, pak para mesditës aty nga ora 11.20, Eglant Koçi ishte duke përshkuar zonën e sheshit Wilson në Tiranë, pak metra larg ish Bllokut.

Ai po bënte punën e tij tashmë të përditshme të korrierit në pikat e këmbimit valutor, kryesisht për kriptomonedha.

Pamje nga një kamera sigurie kanë fiksuar momentet kur Eglanti ndodhet në motorin e tij dhe pranë gjendet një makinë siç shihni foton.

Në një moment teksa lëvizte me motorin e tij me targa “CT969”, ai ndërpreu çdo kontakt. Familjarët u alarmuar dhe njoftuan policinë.

Denoncimi u bë në Komisariatin nr 2 të Tiranës. Familjarët kanë deklaruar se ai nuk ka pasur konflikte apo probleme të njohura me persona të tjerë.

Policia nisi kërkimet dhe gjeti motorin e braktisur të të riut, por asnjë gjurmë të Colit, siç e njohin Eglantin.

Dinamika e zhdukjes që zbardhi noa.al është e tillë: Eglanti kishte miqësi me Armand Shakaj dhe shkoi te një lokal bashkë me të, pa e ditur se çfarë e priste.

Sot, policia e Tiranës konfirmoi se ka identifikuar 41-vjeçarin Armand Shakaj. Ai dyshohet se ka mbajtur peng 34-vjeçarin Eglant Koçi.

Dyshimet e deritanishme të hetuesve të Krimeve të Rënda në Policinë e Tiranës lidhen me një sasi parash digjitale që 34-vjeçari posedonte në aparatin e tij celular. Kjo pistë po konsiderohet si një nga motivet kryesore që mund të ketë çuar në rrëmbimin e tij.

Pasi u gjet motori i të riut të zhdukur, u bë i mundur identifikimi dhe kontrolli i ambientit ku është futur 34-vjeçari Eglant Koçi, ambient nga i cili më pas ka dalë autori i dyshuar dhe mund të ketë marrë me vete, me automjet, 34-vjeçarin.

Eglant Koçi

Policia tha zyrtarisht sot se është ushtruar kontroll i imtësishëm në ambientin e dyshuar, ku dyshohet se mbahej peng 34-vjeçari, si dhe në shumë ambiente të tjera dhe në terren, por deri tani nuk është bërë e mundur gjetja e Eglantit.

Po nga veprimet hetimore ka rezultuar gjithashtu se autori i dyshuar ka larguar motomjetin e 34-vjeçarit nga vendi ku ishte parkuar fillimisht.

Automjeti me të cilin dyshohet se është transportuar Eglanti, është gjetur dhe sekuestruar në cilësinë e provës materiale.

Gjithashtu, është arrestuar në flagrancë shtetasi Enea Zyferi, 25 vjeç, i dyshuar për veprën penale “Përkrahja e autorit të krimit”. Enea dyshohet se ka ndihmuar 41-vjeçarin Armand Shakaj në këtë rast rrëmbimi të veshur me shumë mister.

Shërbimet e Policisë po vijojnë intensivisht kërkimet për gjetjen e Eglant Koçit.

Ndërkohë, po punohet për lokalizimin dhe kapjen e shtetasit të shpallur në kërkim.

Duke qenë se hetimet janë në vijim, për të mos cenuar ecurinë e tyre, bëjmë me dije se në këtë fazë nuk mund të bëhen publike të gjitha rezultatet e hetimit.

Në vijim, do të jepet informacion më i plotë sipas ecurisë së hetimeve.