Shqipëria do të përjetojë ditë me temperatura të larta gjatë javës së ardhshme, me kulmin që pritet të arrijë 37-38 gradë Celsius në mesditë, paralajmërojnë meteorologët.

Meterologia Tanja Porja shpjegon se paraditja do të ngrohet shpejt, ndërsa mesdita do të jetë shumë e nxehtë. “Një javë e nxehtë deri të mërkurën, më pas të enjten, të premten dhe të shtunën pritet një freskim i lehtë. Megjithatë, temperaturat gjatë mesditës do të mbeten në rreth 33-35 gradë Celsius, ndërsa mëngjeset dhe netët do të jenë relativisht të freskëta, veçanërisht në zonat malore,” tha Porja.

Në zonat bregdetare, termometri i mëngjesit do të luhatet nga 19-20 gradë, ndërsa në brendësi të vendit do të jetë 15-16 gradë Celsius. Autoritetet këshillojnë kujdes të shtuar ndaj nxehtësisë, sidomos për fëmijët, të moshuarit dhe personat me probleme shëndetësore.