Komuniteti shqiptar që jeton në zonën e Fermos ka shprehur indinjatën, dhimbjen dhe dënimin e fortë për agresionin brutal të ndodhur ditët e fundit pranë lokalit “Tabù”, në shëtitoren La Malfa të Lido Tre Archi, ku i plagosur mbeti Blerim Muça, një bashkëkombës 50-vjeçar, murator i vlerësuar nga të gjithë, i cili ndodhet i shtruar në gjendje të rëndë në spitalin Torrette të Ankonës.

“Si komunitet që prej vitesh jemi të integruar dhe aktivë në jetën sociale dhe ekonomike të këtij territori, nuk mund dhe nuk duam të qëndrojmë indiferentë përballë akteve të tilla barbarie. Ajo që ndodhi nuk është vetëm një sulm ndaj një qytetari të vetëm, por një plagë e thellë për bashkëjetesën civile dhe qetësinë e të gjithë banorëve të bregdetit të Fermos”, deklaroi Gëzim Zira, president i Shoqatës “Skënderbeu”.

Ai dënoi ashpër sjelljen e grupit të të rinjve me origjinë nga Afrika e Veriut, të cilët dyshohet se janë përgjegjës për ngjarjen.

“Është e papranueshme që siguria e rrugëve tona, e familjeve tona dhe e punëtorëve të vihet në rrezik nga individë të përkushtuar ndaj dhunës dhe kaosit, në shpërfillje të ligjit dhe jetës njerëzore”, tha Zira.

Komuniteti shqiptar shprehu gjithashtu besimin e plotë te drejtësia dhe forcat e rendit italiane, duke i falënderuar për reagimin e shpejtë.

“Besojmë se hetuesit, edhe falë dëshmive dhe pamjeve të kamerave të sigurisë, do të arrijnë të identifikojnë dhe të vënë sa më shpejt para drejtësisë autorët e këtij akti, duke garantuar një dënim shembullor që do të pengojë përsëritjen e krimeve të tilla”, deklaroi Granit Muçaj, president i Federatës së Shqiptarëve në Itali (FNAI).

Muçaj u bëri thirrje institucioneve vendore dhe autoriteteve kompetente që të ndërmarrin masa konkrete për forcimin e sigurisë në zonë.

“Kërkojmë një sinjal të fortë nga institucionet. Është urgjente rritja e masave të kontrollit, parandalimit dhe pranisë së forcave të rendit në bregdetin e Fermos, për t’u rikthyer qytetarëve sigurinë dhe qetësinë që meritojnë, pa asnjë dallim”, u shpreh ai.

Në përfundim të reagimit, komuniteti shqiptar shprehu solidaritetin me familjen e 50-vjeçarit të plagosur rëndë dhe urimet për shërimin e tij.

“Në këtë moment të vështirë dhimbjeje dhe shqetësimi, i gjithë komuniteti shqiptar qëndron pranë familjes së bashkëkombësit tonë, duke u lutur për shërimin e tij dhe duke ofruar çdo mbështetje të mundshme”, thuhet në deklaratë.