Mijëra qytetarë janë mbledhur sot në Tiranë për të vijuar protestën kundër projektit në Zvërnec, ndërsa tubimi ka hyrë në ditën e 9-të të tij.

Gjatë marshimit nga sheshi drejt Bulevardit “Dëshmorët e Kombit” dhe Kryeministrisë, protestuesit kanë shpalosur një manifest të ri politik, ku kërkohen ndryshime të thella në sistemin qeverisës.

Në këtë manifest, protestuesit kërkojnë krijimin e një qeverie tranzitore të votuar nga populli, si dhe realizimin e një procesi vettingu për çdo politikan.

Tubimi është zhvilluar nën moton “Shqipëria e re”, ndërsa qytetarët mbanin pankarta të ndryshme dhe thirrje për dorëheqjen e qeverisë aktuale. Një grup studentësh ka udhëhequr marshimin me pankartën “Nuk i ke larë akoma hesapet me studentët”.

Protesta vijon të mbetet një nga tubimet më të mëdha të ditëve të fundit, me pjesëmarrje të qytetarëve edhe nga treva të ndryshme të vendit.