SHKODËR – Kryeministri Edi Rama u ndal sërish te roli i influencerëve dhe blogerëve në protestat për projektin e Zvërnecit, duke deklaruar se disa prej tyre janë më shumë të interesuar për numrin e ndjekësve në rrjetet sociale sesa për çështjet mjedisore.

Gjatë fjalës së mbajtur në Shkodër, në kuadër të 35-vjetorit të themelimit të degës së Partisë Socialiste, Rama theksoi se ata që kanë shqetësime reale për mjedisin në Zvërnec duhet të bazohen në fakte dhe argumente.

“Kush e ka seriozisht shqetësimin për Zvërnecin, bujrum, dëgjoni argumentet dhe faktet. Nuk mund të thoni anuloni projektin kur projekti po realizohet. Projektin s’e bëjnë influencerat, po e punon një grup i madh njerëzish, që nuk vijnë në Shqipëri për ta shkatërruar”, u shpreh Rama.

Lideri i qeverisë theksoi gjithashtu se qeveria nuk pretendon të bëjë gjithçka perfekt, por se nuk janë tradhtarë. Ai kujtoi ndërhyrjet e qeverisë pas tërmetit të 2019-s dhe ndihmën ndaj mijëra shqiptarëve që humbën shtëpitë.

“Ka pasur raste kur qytetarë dolën në protesta thjesht për të marrë likes e folloë në Instagram. Nuk dua të them që nuk ka arsye për të protestuar, ka. Por ka edhe arsye për të ndërtuar”, tha Rama.

Kryeministri theksoi se dera e hapur për të përfituar nga zhvillimet e ligjshme dhe për të mbrojtur të drejtën qytetare nuk duhet të mbyllet nga persona që nuk kanë interes për të ndërtuar, por për të përfituar nga imazhi publik.