Detaje të reja kanë dalë në dritë lidhur me vrasjen e 27-vjeçarit Ardian Baloshi, ngjarje e ndodhur paraditen e së hënës në zonën e Paskuqanit.

Sipas dëshmive të miqve të viktimës, i riu ishte duke ecur në një rrugicë së bashku me shokët e tij, kur u qëllua me armë zjarri nga një 39-vjeçar, i cili dyshohet se hapi zjarr nga një automjet në lëvizje.

Baloshi mori disa plagë nga të shtënat me armë automatike dhe u transportua menjëherë drejt spitalit nga miqtë e tij, por nuk arriti t’u mbijetonte plagëve të marra.

Një prej shokëve të viktimës, në një prononcim për mediat, e përshkroi 27-vjeçarin si një djalë që jetonte vetëm me nënën e tij dhe nuk kishte familjarë të tjerë të afërt.

“Jetonte vetëm me nënën. Nuk kishte as motër, as vëlla dhe as baba. U qëllua në kokë dhe gjendja e tij ishte tepër e rëndë”, tha ai.

Pas ngjarjes, autori i dyshuar, Sadik Llanaj, është larguar nga vendi i krimit me automjet, ndërsa forcat e Policisë së Shtetit dhe njësitë speciale RENEA janë angazhuar në kërkimin dhe kapjen e tij, pasi dyshohet se mund të jetë ende i armatosur.

Burime nga zona bëjnë me dije se autori dhe viktima banonin në të njëjtën lagje dhe njiheshin me njëri-tjetrin. Sipas miqve të përbashkët, nuk kishte pasur sinjale të mëparshme për ndonjë konflikt mes tyre, çka e bën ngjarjen edhe më të paqartë.

Dëshmitarët tregojnë se autori ka qëlluar disa herë në drejtim të 27-vjeçarit, ndërsa personat që ndodheshin pranë kanë shpëtuar pa u lënduar.

Policia vijon hetimet për zbardhjen e plotë të rrethanave dhe motiveve që çuan në këtë ngjarje të rëndë.