TIRANË – Publikohet fotoja e autorit të dyshuar të vrasjes së ndodhur mesditën e sotme në Kamëz, ku mbeti i vdekur 27-vjeçari Ardian Baloshi. Ai është shtetasi Sadik Llanaj, 39 vjeç, i cili tashmë është shpallur në kërkim kombëtar si i dyshuari kryesor për krimin e rëndë të ndodhur në rrugën “Dervish Luzha”.

Grupi hetimor ka arritur të rindërtojë dinamikën e plotë të atentatit, ku rezulton se autori ka shfrytëzuar lëvizjen me automjet për të goditur në befasi.

Atentat nga makina në lëvizje: Si ndodhi krimi

Sipas të dhënave më të fundit nga terreni, viktima Ardian Baloshi ndodhej në rrugë, i shoqëruar nga disa persona të tjerë, në momentin kur është sulmuar.

Autori Sadik Llanaj i është afruar grupit të të rinjve me automjetin e tij.

Pa zbritur nga makina, 39-vjeçari ka hapur zjarr në drejtim të 27-vjeçarit, duke e lënë të plagosur rëndë në tokë.

Menjëherë pas të shtënave, Llanaj është larguar me shpejtësi nga vendngjarja me të njëjtin automjet me të cilin kreu krimin.

Ndërkohë, kalimtarët e rastit kanë vepruar me urgjencë duke e ngarkuar të riun në një mjet privat për ta nisur drejt Spitalit të Traumës, por plumbat në pjesët vitale të trupit i morën jetën rrugës për në spital.

Shkaku: Sherri banal në minifutboll

Hetimet paraprake konfirmojnë se dy shtetasit ishin konfliktuar pak kohë më parë gjatë një loje kalçetoni (minifutboll). Ky sherr banal dhe i çastit ka degraduar në një ndjekje dhe hakmarrje me armë zjarri mesditën e sotme.

Aktualisht, forcat speciale RENEA dhe efektivat e Drejtorisë së Tiranës kanë rrethuar perimetrin e gjerë ku dyshohet se ka lëvizur makina e autorit. Operacioni mbetet i përqendruar në lokalizimin e mjetit dhe kapjen e Sadik Llanajt, i cili konsiderohet person me rrezikshmëri të lartë dhe me armë me vete.