SHIJAK – Policia ka vënë në pranga autorin e dyshuar të plagosjes me armë zjarri të ndodhur një ditë më parë në ambientet e një lokali në Shijak. Në pranga ka rënë shtetasi Elton Beqiri, i cili akuzohet si personi që qëlloi mbi bashkëfshatarin e tij.

Nga kjo ngjarje e rëndë ka mbetur i plagosur shtetasi Bjondi Guri. Ai është transportuar me urgjencë drejt spitalit rajonal, ku po merr ndihmën e nevojshme mjekësore nga bluzat e bardha dhe, fatmirësisht, raportohet se ndodhet jashtë rrezikut për jetën.

Sipas burimeve të para nga grupi hetimor, zanafilla e këtij atentati të mbetur në tentativë dyshohet të jetë një konflikt i vjetër dhe i mbartur mes autorit të dyshuar Elton Beqiri dhe të dëmtuarit Bjondi Guri.

Materialet procedurale i kanë kaluar prokurorisë kompetente, ndërsa po punohet për dokumentimin e plotë ligjor të rrethanave të ngjarjes dhe zbardhjen e motiveve të sakta të konfliktit.