Shitësi i misrit që po lë në hije atraksionet turistike, i riu turk kthehet në fenomen të rrjeteve sociale

Një shitës i thjeshtë misri dhe gështenjash në Stamboll është kthyer papritur në një nga atraksionet më të vizituara të qytetit, falë famës që fitoi në rrjetet sociale.

25-vjeçari Alper Temel punon prej shtatë vitesh në stendën familjare në lagjen historike Karaköy, së bashku me dy vëllezërit e tij. Por që nga viti 2024, kur videot e tij u bënë virale për shkak të pamjes së jashtme dhe mënyrës së komunikimit me klientët, stenda e vogël është kthyer në një destinacion të veçantë për turistët.

Vizitorë nga vende të ndryshme udhëtojnë drejt Karaköy vetëm për të bërë një foto ose selfie me të. Disa guida turistike e kanë përfshirë tashmë stendën në itineraret e tyre, ndërsa influencerë të shumtë kanë realizuar video që kanë rritur edhe më shumë popullaritetin e tij.

Fama e Alperit ka sjellë vëmendje të madhe edhe për biznesin familjar, i cili prej më shumë se 15 vitesh shet misër dhe gështenja të pjekura.

“Jam shumë mirënjohës për mbështetjen që më japin njerëzit. Si çdo i ri, përpiqem të ndihmoj familjen time sa më shumë. Kjo famë e ka përshpejtuar këtë proces”, thotë ai.

Që nga hapja e profileve të tij në rrjetet sociale në tetor 2025, Temel ka grumbulluar mbi 960 mijë ndjekës në Instagram dhe më shumë se 695 mijë në TikTok.

Videot e tij tregojnë momentet kur u shërben turistëve, bën foto me ta dhe komunikon me fansat. Shikimet dhe pëlqimet kanë shpërthyer, duke kaluar shifrën e 11 milionë pëlqimeve.

Popullariteti i tij ka sjellë edhe oferta të shumta. Ai thotë se ka marrë propozime nga agjenci modelingu, oferta për role në filma dhe seriale televizive, madje edhe propozime për martesë.

Një media turke e shpalli madje “Burri i Vitit 2025”.

Megjithatë, Alperi thotë se fama nuk e ka ndryshuar dhe se vazhdon të përqendrohet te puna.

“Kur njerëzit të tregojnë dashuri dhe vlerësim është diçka shumë e bukur, por sjell edhe përgjegjësi. Për këtë arsye përpiqem të qëndroj i fokusuar tek puna ime”, shprehet ai.

Sipas tij, fama është një mundësi për të promovuar Turqinë dhe për të ftuar më shumë vizitorë të njohin vendin.

“Do të doja që njerëzit të vijnë dhe të përjetojnë kulturën, natyrën dhe mikpritjen tonë. Për ne, ata që vijnë nga jashtë nuk janë turistë, por mysafirë”, përfundon ai.