PRISHTINË – Kryetari i Lëvizjes Vetëvendosje, Albin Kurti, ka deklaruar se gjatë javëve në vijim do të nisë bisedimet zyrtare me të gjitha subjektet politike në Kosovë për të diskutuar mbi formimin e qeverisë së re. Deklarata u bë gjatë festimeve të organizuara në orët e vona të mbrëmjes në sheshin "Skënderbeu" në Prishtinë, pas publikimit të rezultateve paraprake të votimit.

Nga fjalimi i mbajtur përpara mbështetësve, Kurti bëri të qartë se konfigurimi i ri parlamentar do të kërkojë bashkëpunim për ndërtimin e kabinetit ekzekutiv.

"Natyrisht se gjatë javëve në vijim do të komunikojmë, do t’i takojmë e do të bashkëpunojmë me të gjitha subjektet politike të Republikës së Kosovës", u shpreh ai, duke konfirmuar hapjen e partise së tij ndaj dialogut politik.

Referuar të dhënave të fundit nga procesi i numërimit, Lëvizja Vetëvendosje ka marrë sërish mbështetjen më të madhe në votime, me rreth 43.05% të votave. Megjithatë, për shkak të shpërndarjes së re të votës, kjo forcë politike llogaritet të hyjë në parlament me 9 deputetë më pak se në legjislaturën e kaluar.

Nga ana tjetër, Partia Demokratike e Kosovës (PDK) ruan pozicionin si forcë e dytë me 21.23% të votave, duke shënuar një rritje të lehtë. Ndërkohë, rritjen më të madhe në kampin opozitar e ka regjistruar Lidhja Demokratike e Kosovës (LDK), lista e së cilës u drejtua nga Vjosa Osmani. LDK ka siguruar paraprakisht 17.68% të votave, çka sipas projeksioneve të Demokracisë në Veprim (DNV) do t’i sigurojë asaj 20 deputetë në parlament, ose 5 mandate më shumë se në legjislaturën e fundit.