PRISHTINË – Komisioni Qendror i Zgjedhjeve (KQZ) ka publikuar të dhënat e fundit preliminare nga zgjedhjet e parakohshme parlamentare të 7 qershorit, ku deri më tani janë numëruar 97% e kutive të votimit. Sipas këtyre rezultateve, Lëvizja Vetëvendosje vazhdon të prijë në rang vendi, por regjistron një rënie të ndjeshme të votave krahasuar me procesin e kaluar elektoral.

Rezultatet aktuale dëshmojnë se Lëvizja Vetëvendosje kryeson me 43.03% të votave, e ndjekur nga Partia Demokratike e Kosovës, e cila mbetet forca e dytë politike me 21.21%. Lidhja Demokratike e Kosovës pozicionohet e treta me 17.68%, duke reflektuar një rritje që pritet t’i sigurojë rreth 20 mandate në Kuvend, ndërsa Aleanca për Ardhmërinë e Kosovës ka marrë deri më tani 7.1% të votave.

Në nivel statistikor, krahasuar me zgjedhjet e kaluara parlamentare, Vetëvendosje ka regjistruar një rënie prej 6% në përqindje totale.

Bazuar në rezultatet e deritanishme paraprake, pa përfshirë votat e diasporës, LVV-ja ka siguruar rreth 292 mijë vota. Në procesin e kaluar elektoral, pas numërimit të votave të mërgatës, kjo parti kishte siguruar gjithsej 478 mijë e 77 vota, çka nënkupton se aktualisht ka rreth 189 mijë vota më pak përpara përmbylljes së plotë të procesit.

Kjo ecuri e votës pritet të ndryshojë balancën e mandateve në legjislaturën e re, teksa sytë e partive politike mbeten tashmë te numërimi i votave të diasporës, atyre me postë dhe votave med kusht, të cilat do të përcaktojnë projektimin përfundimtar të stolave në Kuvendin e Kosovës.