TIRANË – Tregu i pasurive të paluajtshme në Shqipëri po shfaq shenja të qarta të një ndryshimi cikli, ku rënia e theksuar e volumit të shitjeve po shoqërohet me një ngadalësim të vrullit të çmimeve, veçanërisht në kryeqytet. Sipas Vrojtimit të fundit të Bankës së Shqipërisë për gjysmën e dytë të vitit të kaluar, numri i pronave të shitura nga agjencitë e monitoruara pësoi një rënie drastike prej 35%, duke zbritur në 1,273 prona, nga 1,959 që ishin raportuar në gjashtëmujorin e parë.

Ky ngadalësim reflektohet edhe në numrin mesatar të shitjeve për çdo subjekt, i cili ra nga 11 në 8 prona. Pavarësisht kësaj rënieje në transaksione, çmimet në rang kombëtar kanë vijuar rritjen, të nxitura kryesisht nga tkurrja e ofertës së re dhe inventarëve të pashitur. Indeksi Fischer i Bankës Qendrore dëshmon se çmimi mesatar i banesave u rrit me 11.7% krahasuar me gjashtëmujorin e kaluar dhe me 28% në bazë vjetore, ndonëse ky ritëm është më i ulët se kulmi prej 41.7% i regjistruar në fillim të vitit të kaluar.

Në nivel gjeografik, vrojtimi tregon një zhvendosje të blerjeve drejt zonave jashtë qyteteve, të cilat zunë 32% të totalit të shitjeve. Ndërkohë, koha mesatare e realizimit të një shitjeje në shkallë vendi u ul në 9.1 muaj.

Ecuria e Tregut sipas Rajoneve dhe Financimit:

Tirana në ngadalësim: Indeksi i çmimeve në kryeqytet mbeti i pandryshuar krahasuar me gjashtëmujorin e mëparshëm, ndërsa rritja vjetore pësoi rënie drastike në 4.4%, nga 32.6% që ishte në fillim të vitit. Koha e shitjes në Tiranë u shkurtua në 8.1 muaj.

Zonat Bregdetare: Koha mesatare e shitjes së një prone pësoi rritje, duke arritur në 9.9 muaj (nga 8.7 muaj në vrojtimin e kaluar).

Financimi me Kredi: Huatë bankare mbeten shtyllë kryesore e tregut, ku rreth 61% e pronave të shitura për banim ose qëllime tregtare u financuan përmes kredive, ku në 38% të rasteve banka mbuloi deri në 60% të vlerës së pronës.

Sa i përket negociatave, raporti zbulon se rreth 46% e agjentëve arritën të shesin me çmimin fillestar ose me një ulje minimale deri në 5%. Ekspertët e Bankës së Shqipërisë interpretojnë se rënia e njëkohësishme e shitjeve dhe e inventarit të pronave të lira lidhet drejtpërdrejt me frenimin e ofertës së re nga ana e ndërtuesve, çka po mban ende pezull ekuilibrat e çmimeve përballë rënies së kërkesës.