LONDËR – Këngëtarja shqiptare me famë botërore, Bebe Rexha, ka shënuar një tjetër kulm në karrierën e saj muzikore, duke performuar për herë të parë në stadiumin mitik "Wembley" të Londrës, në kuadër të festivalit prestigjioz britanik "Summertime Ball 2026". Artistja dhuroi një spektakël elektrizues përpara një audience prej rreth 80 mijë spektatorësh, të cilët ndoqën live performancën e saj plot energji.

Përveç vokalit dhe performancës skenike, Rexha tërhoqi vëmendjen e medieve ndërkombëtare edhe me stilin e saj të kuruar, duke u shfaqur e veshur me një kombinim unik xhinsi dhe një xhaketë rozë.

Gjatë setit të saj muzikor, artistja interpretoi pesë nga projektet më të rëndësishme të repertorit të saj. Ajo e nisi performancën me hitin "In The Name Of Love", për të vijuar me versionin e ripunuar dance të "Me, Myself & I", si dhe këngën "New Religion".

Kulmi i mbrëmjes në "Wembley": Një nga momentet më të veçanta të koncertit ishte interpretimi për herë të parë live i këngës "Sad Girls", bashkëpunimi më i ri i artistes me producentin dhe DJ-në e njohur francez, David Guetta. Seti u përmbyll nën entuziazmin e plotë të publikut me superhitin global "I’m Good".

Kjo paraqitje e suksesshme në "Summertime Ball 2026" vjen në një moment kyç për karrierën e Bebe Rexhës, e cila ka paralajmëruar publikimin e albumit të saj të ri të studios, të titulluar "Dirty Blonde", projekt që pritet të lançohet brenda pak ditësh për tregun ndërkombëtar.