TIRANË – Ish-fituesja e edicionit të pestë të "Big Brother VIP Albania", Selin Bollati, ka ndarë një mesazh tejet emocionues në rrjetet sociale me rastin e ditëlindjes së moderatorit dhe kantautorit të njohur, Ardit Gjebrea. Përmes një postimi të shoqëruar me një fotografi nga skena e "Këngës Magjike", ku të dy bashkëprezantuan festivalin, ajo ka shprehur mirënjohjen e saj të thellë profesionale dhe personale.

Në urimin e saj, Bollati e cilëson Gjebrean si mentor dhe shprehet e privilegjuar për mundësinë e bashkëpunimit me të.

"Gëzuar Ditëlindjen Ardit! Sa dashuri mban zemra ime për ty, këtë as nuk e përshkruaj dot, as fjalë mjaftueshëm nuk ka… Përjetë mirënjohëse dhe absolutisht me shumë fat që Zoti më solli tek ty. Festofsh 100-ra ditëlindje të tjera, Mentor!" – ka shkruar ajo në platformat e saj sociale.

Mesazhi ka tërhequr menjëherë vëmendjen e ndjekësve dhe publikut, duke u shoqëruar me reagime të shumta. Krahas angazhimeve në ekran, Selin Bollati vijon të mbetet në qendër të vëmendjes së medieve rozë edhe për jetën e saj private, veçanërisht për romancën me Gimbon, marrëdhënie e cila nisi brenda shtëpisë së famshme të reality show-t.