TIRANË – Protestuesit që kundërshtojnë projektin turistik në Zvërnec dhe politikat e qeverisë kanë mbërritur mbrëmjen e sotme para godinës së Kryeministrisë, pas marshimit të organizuar nga sheshi Sheshi Skënderbej.

Tubimi, që shënon ditën e tetë radhazi të protestave, u shoqërua me thirrje kundër qeverisë dhe me sloganin kryesor të mbrëmjes: “Boll është boll”, i cili u përsërit vazhdimisht nga turma e mbledhur përpara selisë së ekzekutivit.

Gjatë fjalimeve të mbajtura në podium, protestuesit kërkuan ndryshim politik, më shumë transparencë për projektet e debatueshme dhe mbrojtje të zonave të konsideruara me rëndësi mjedisore.

Një prej protestueseve deklaroi:

“Jemi sërish këtu për një qëllim. Gardhi u hoq, të heqim edhe këta! Ka ardhur koha të kthejmë në Shqipëri fëmijët e larguar në emigrim. Boll është boll! Zoti kryeministër, kam një lajm për ty: diaspora këtë herë nuk do të vijë për pushime, por për protestë.”

Protestat nisën fillimisht si reagim ndaj projektit të planifikuar në zonën e Zvërnecit, por gjatë ditëve të fundit ato kanë marrë edhe një dimension më të gjerë politik, me kërkesa që përfshijnë dorëheqjen e qeverisë, ndryshime ligjore dhe rishikimin e politikave të investimeve strategjike.

Ndërkohë, autoritetet nuk kanë raportuar incidente serioze gjatë zhvillimit të marshimit dhe tubimit të mbrëmjes. Situata në qendër të Tiranës vijon të monitorohet nga forcat e rendit.