PRISHTINË – Dy persona janë ndaluar nga Policia e Kosovës, pasi dyshohet se kanë dëmtuar fletët e votimit gjatë procesit zgjedhor në Prishtinë dhe Drenas.

Sipas autoriteteve, të dyshuarit kanë grisur fletëvotimet në qendrat përkatëse të votimit, duke sjellë hapjen e procedimeve penale për veprën e asgjësimit të dokumentit të votimit.

Të ndaluarit janë shoqëruar në ambientet policore dhe janë vendosur në mbajtje për 48 orë, ndërsa hetimet po vijojnë në bashkëpunim me prokurorinë kompetente.

Zëdhënësja e Policisë për Rajonin e Prishtinës, Flora Ahmeti, bëri të ditur se deri tani janë regjistruar dy raste të tilla.

“Deri tani në rajonin e Prishtinës janë hapur dy raste për asgjësim të dokumentit të votimit, në Drenas dhe në Prishtinë, ku dyshohet se personat e përfshirë kanë dëmtuar (grisur) fletëvotimet. Personat e dyshuar janë dërguar në mbajtje për 48 orë, ndërkohë që veprimet hetimore po kryhen në koordinim me prokurorinë”, deklaroi Ahmeti.

Autoritetet nuk kanë bërë publike identitetet e të ndaluarve, ndërsa hetimet vijojnë për zbardhjen e plotë të rrethanave të ngjarjeve.