KORÇË – Gjykata e Shkallës së Parë e Juridiksionit të Përgjithshëm Korçë ka caktuar masën e sigurisë “arrest në burg” për Violand Braçellarin, i dyshuar për vrasjen e efektivit të Policisë së Shtetit, Enea Mekolli, dhe plagosjen e efektivit tjetër, Edison Adri.

Seanca gjyqësore u zhvillua këtë të diel në ambientet e Spitalit Universitar të Traumës në Tiranë, ku 41-vjeçari ndodhet i shtruar për shkak të plagëve të marra gjatë përplasjes së armatosur me policinë.

Ngjarja e rëndë ndodhi më 4 qershor në fshatin Lozhan të Maliqit, gjatë një operacioni për kapjen e Braçellarit, i cili ishte në kërkim nga autoritetet. Sipas hetimeve paraprake, ai ka qëlluar me armë zjarri ndaj forcave të policisë, duke i marrë jetën efektivit Enea Mekolli dhe duke plagosur kolegun e tij, Edison Adri.

Në vendimin e saj, gjykata ka vlerësuar si të ligjshëm arrestimin në flagrancë të të dyshuarit dhe ka pranuar kërkesën e prokurorisë për caktimin e masës më të rëndë të sigurisë.

Braçellari po hetohet për veprat penale “Vrasja e punonjësve të Policisë së Shtetit”, “Vrasja e punonjësve të Policisë së Shtetit”, mbetur në tentativë, “Mbajtja pa leje dhe prodhimi i armëve, armëve shpërthyese dhe municionit”, si dhe “Prodhimi dhe mbajtja pa leje e armëve të gjuetisë dhe sportive”.

Vendimi mund të ankimohet në Gjykatën e Apelit të Juridiksionit të Përgjithshëm brenda afatit ligjor prej pesë ditësh nga komunikimi i tij i arsyetuar.

Ndërkohë, hetimet për zbardhjen e plotë të rrethanave të ngjarjes vijojnë nga organet ligjzbatuese.

VENDIMI

1. Vleftesimin e ligjshëm të arrestit në flagrancë të personit nën hetim V.B, i dyshuar për kryerjen e veprave penale “Vrasje e punonjësve të policisë së shtetit”, “Vrasje e punonjësve të policisë së shtetit” ngelur në tentativë, “Mbajtje pa leje dhe prodhimi i armëve, armëve shpërthyese dhe i municionit” në formën e mbajtjes së armëve të zjarrit në ambiente publike dhe “Prodhimi dhe mbajtja pa leje e armëve të gjuetisë dhe sportive” në formën e mbajtjes së armës së gjuetisë dhe municionit, parashikuar prej neneve 79/b, 79b-22, 278/1 dhe 280 të Kodit Penal.

2. Caktimin ndaj personit nën hetim V.B, të masës së sigurimit personal “Arrest në burg” të parashikuar nga neni 238 i Kodit të Procedurës Penale. 3. Për ekzekutimin e këtij vendimi ngarkohet Prokuroria pranë Gjykatës së Shkallës së Parë të Juridiksionit të Përgjithshëm Korçë.

4. Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e komunikimit të vendimit të arsyetuar të gjykatës.

U shpall nga Gjykata e Shkallës së Parë të Juridiksionit të Përgjithshëm Korçë në ambientet e Spitalit Universitar të Traumës Tiranë, sot më datë 07.06.2026.