TIRANË – Kryeministri Edi Rama ka reaguar ashpër ndaj protestave që janë zhvilluar ditët e fundit në disa qytete të vendit, duke i cilësuar pjesëmarrësit në to si një përzierje “delirantësh”, “influencerash” dhe qytetarësh të pakënaqur.

Në podkastin e tij “Flasim”, Rama deklaroi se një pjesë e protestuesve nuk kanë lidhje reale me çështjet që mbrojnë, duke përmendur konkretisht edhe debatin për zonat e mbrojtura dhe projektet e zhvillimit turistik në vend.

“99% e atyre që mbrojnë flamingot nuk i kanë parë kurrë me sy”, u shpreh kryeministri, duke shtuar se në turmën e protestuesve përfshihen edhe persona që, sipas tij, “jetojnë me ‘like’ dhe nuk paguajnë taksa”.

Ai i ndau protestuesit në disa kategori, duke përmendur nga njëra anë qytetarë të shqetësuar dhe nga ana tjetër persona që i cilësoi si “delirantë” apo të orientuar nga rrjetet sociale.

Rama paralajmëroi gjithashtu se situata e protestave mund të ndikojë në sezonin turistik, duke pretenduar se janë vërejtur shenja të anulimeve të rezervimeve në disa zona bregdetare, përfshirë Sarandën.

Në të njëjtin komunikim, kryeministri mbrojti projektet e qeverisë në fushën e turizmit dhe investimeve strategjike, duke theksuar se ato do të realizohen pavarësisht kundërshtimeve.

“Projekti do të bëhet, sepse është një e mirë e madhe për ekonominë dhe një kapërcim për Shqipërinë turistike”, deklaroi ai.

Deklaratat e Ramës kanë ngjallur reagime të shumta në rrjetet sociale, ndërsa debati mbi projektet në zonat bregdetare dhe ndikimin e tyre në mjedis vijon të mbetet i ndezur.