TIRANË – Kryeministri Edi Rama ka reaguar me tone ironike ndaj protestuesve që një ditë më parë zhvilluan një tubim në zonën e Zvërnecit, duke i akuzuar se, në përpjekje për të mbrojtur mjedisin dhe habitatin e flamingove, kanë shkaktuar vetë dëme në zonën bregdetare.

Përmes një mesazhi të publikuar në rrjetet sociale, kreu i qeverisë u bëri thirrje protestuesve që në vizitat e ardhshme të shmangin lëvizjen me automjete pranë habitatit natyror të shpendëve dhe të tregojnë më shumë kujdes për pastërtinë e mjedisit.

“Kur të shkoni herë tjetër në atë breg për t’ua qarë hallin flamingove, mos i bëni për të qarë duke ua zhvirgjëruar plazhin me makinat tuaja”, shkruan Rama, duke shtuar se prania e automjeteve në plazh mund të krijojë shqetësim për shpendët dhe të japë përshtypjen e nisjes së punimeve në zonë.

Kryeministri kujtoi gjithashtu efektet pozitive të moratoriumit 10-vjeçar të gjuetisë, duke theksuar se flamingot ishin larguar më herët nga zona, por janë rikthyer pas masave mbrojtëse të ndërmarra ndër vite.

Në reagimin e tij, Rama kritikoi edhe ndotjen e mundshme të lënë pas nga pjesëmarrësit në protestë, duke përmendur mbetjet e gjetura në zonë, si kanoçet e birrës, dhe u bëri thirrje qytetarëve që të respektojnë mjedisin gjatë aktiviteteve të tyre.

Mesazhin e tij, kreu i qeverisë e mbylli me urimin për një të diel të qetë për të gjithë qytetarët.