TIRANË – Ka nisur zyrtarisht protesta e shtatë kundër projektit të Zvërnec dhe qeverisë së kryeministrit Edi Rama, ndërsa qindra qytetarë janë mbledhur në kryeqytet për të shprehur kundërshtimin e tyre ndaj politikave qeveritare.

Gjatë marshimit, protestuesit kanë artikuluar thirrje të forta kundër qeverisë, duke kërkuar në kor dorëheqjen e kryeministrit Rama. “Poshtë qeveria” ishte një nga sloganet më të dëgjuara gjatë tubimit, teksa pjesëmarrësit vijuan lëvizjen drejt godinës së Kryeministrisë.

Protesta vjen në vazhdën e kundërshtimeve ndaj projektit të Zvërnecit dhe është shoqëruar me kërkesa për më shumë transparencë, llogaridhënie institucionale dhe mbrojtje të interesit publik. Organizatorët kanë deklaruar se mobilizimi qytetar do të vazhdojë edhe në ditët në vijim, ndërsa kërkojnë reagim nga institucionet për shqetësimet e ngritura.

Tubimi i sotëm është pjesë e një serie protestash që po zhvillohen paralelisht në Shqipëri dhe në komunitetet shqiptare në diasporë, ku kërkesat kryesore mbeten ndalimi i projektit të Zvërnecit dhe largimi i qeverisë aktuale.