Firence, Itali – Shqiptarët që jetojnë në Firence janë bashkuar me protestat e organizuara nga diaspora shqiptare në vende të ndryshme të botës, duke shprehur pakënaqësinë ndaj qeverisë shqiptare dhe duke kërkuar ndryshime politike në vend.

Qindra protestues u mblodhën në qytetin italian, ku me flamuj kombëtarë dhe pankarta me mesazhe kritike ndaj qeverisë, kërkuan dorëheqjen e menjëhershme të kryeministrit Edi Rama dhe mbajtjen e përgjegjësive institucionale për çështje që, sipas tyre, lidhen me menaxhimin e pasurive publike dhe projekteve të debatueshme zhvillimore.

Gjatë tubimit, protestuesit ngritën shqetësime për atë që e konsiderojnë mungesë transparence dhe llogaridhënieje në vendimmarrje, duke përmendur edhe projektet që kanë ngjallur debat publik, përfshirë Zvërnec.

Manifestimi në Firence vjen në kuadër të një serie protestash të organizuara nga komunitetet shqiptare në diasporë. Tubime të ngjashme janë zhvilluar në Washington, Londër, Berlin, Vjenë dhe Milano, duke reflektuar një angazhim të shtuar të diasporës shqiptare në çështjet politike dhe sociale të vendit.

Organizatorët e protestës deklaruan se aktivitetet do të vijojnë edhe në ditët në vijim, ndërsa kërkesat e tyre fokusohen te transparenca, drejtësia dhe mbrojtja e interesit publik.