KOLONJË – Strukturat e Policisë në Kolonjë kanë zbardhur një ngjarje të rëndë të regjistruar dy ditë më parë në fshatin Starje, ku një person mbeti i plagosur rëndë si pasojë e dhunës fizike. Në pranga ka përfunduar një 31-vjeçar, i cili akuzohet si autori i dyshuar i këtij sulmi barbar.

Zbardhja e plotë e dinamikës ka qenë mjaft e vështirë për grupin hetimor, pasi autori ka tentuar të manipulojë ngjarjen për t’i shpëtuar drejtësisë, duke dhënë dëshmi të rreme përpara uniformave të kaltra.

Inskenimi dështon, policia dokumenton dhunën e autorit

Sipas të dhënave të para, 31-vjeçari e ka sulmuar viktimën për motive të dobëta, duke e goditur në mënyrë të përsëritur me grushte dhe shkelma në pjesë të ndryshme të trupit, si dhe në kokë, duke i shkaktuar plagë tejet të rënda.

Menjëherë pas ngjarjes, i riu ka njoftuar autoritetet duke pretenduar se nuk kishte lidhje me incidentin, por thjesht e kishte gjetur bashkëfshatarin e tij të shtrirë dhe të gjakosur në rrugë. Megjithatë, pas veprimeve të thelluara hetimore dhe mbledhjes së provave në terren, policia arriti të dokumentonte shkencërisht se plagosja e rëndë ishte kryer pikërisht nga 31-vjeçari i ndaluar.

I plagosuri transportohet me urgjencë te Trauma

Për shkak të gjendjes tejet kritike shëndetësore dhe dëmtimeve të rënda që ka pësuar në kokë, i plagosuri është transportuar me urgjencë nga spitali rajonal drejt Spitalit të Traumës në Tiranë. Atje ai po merr një trajtim mjekësor më të specializuar nga ekipi i mjekëve.

Materialet procedurale i kanë kaluar Prokurorisë për veprime të mëtejshme, ndërsa grupi hetimor po vijon punën për dokumentimin e plotë ligjor të të gjithë rrethanave që çuan në këtë konflikt të rëndë fizik.