LEZHË – Një sasi lënde shpërthyese ka shpërthyer në orët e para të mëngjesit të së shtunës në fshatin Rrilë të Lezhës. Objekt i këtij sulmi ka qenë banesa e shtetasit Mirash Gjoni.

Sipas të dhënave të para, ngjarja ka ndodhur rreth orës 03:00 të mëngjesit. Nga shpërthimi i fuqishëm janë shkaktuar dëme të shumta materiale në strukturën e banesës, por fatmirësisht nuk raportohet për persona të lënduar apo viktima.

Policia rrethon zonën, nisin hetimet për zbardhjen e ngjarjes

Menjëherë pas sinjalizimit, forca të shumta policie kanë mbërritur në vendngjarje, duke rrethuar perimetrin e sigurisë. Ekspertët e grupit hetimor kanë nisur mbledhjen e provave materiale dhe po këqyrin kamerat e sigurisë në zonë për të bërë të mundur identifikimin dhe kapjen e autorëve.

Hetimet/ Skenar i përsëritur, verifikohet lidhja me një tjetër shpërthim në zonë

Ky incident pason një ngjarje pothuajse identike të regjistruar pak javë më parë në të njëjtën zonë. Më 21 maj, një sasi lënde plasëse shpërtheu në vilën e shtetasit Tom Çungu, duke shkaktuar gjithashtu dëme të konsiderueshme materiale, ngjarje e cila ende nuk ka një autor të identifikuar.

"Grupi hetimor po vijon punën intensive për të sqaruar dinamikën e plotë të ngjarjes dhe po verifikohet nëse dy shpërthimet e fundit në këtë zonë kanë lidhje asocimi apo konflikte të përbashkëta mes palëve", bëjnë me dije burime nga policia lokale.

Hetimet mbeten të hapura, ndërsa autoritetet pritet të dalin me një njoftim zyrtar lidhur me pistat kryesore të këtij sulmi të dytë me eksploziv.

Lezhë/Informacion paraprak

Rreth orës 03:35, në fshatin Rrilë, Lezhë, në portën e jashtme të banesës në pronësi të shtetasit M. M., ka shpërthyer lëndë plasëse, duke shkaktuar vetëm dëme materiale.

Grupi hetimor, nën drejtimin e Prokurorisë, vijon veprimet hetimore për sqarimin e plotë të rrethanave të ngjarjes, dokumentimin ligjor të saj, si dhe për identifikimin dhe kapjen e autorit/autorëve.