TIRANË – Reperi i njohur Arkimed Lushaj, i njohur me emrin artistik Stresi, ka ndarë për publikun momente të papublikuara dhe tejet personale nga jeta e tij, nga fëmijëria e vështirë deri te karriera muzikore dhe përjetimet sentimentale.

Gjatë një interviste në emisionin ‘Elevate’ me Floriana Garo, Stresi rrëfeu episodet më dramatike të jetës së tij, përfshirë vitin 1997, kur së bashku me 24 anëtarë të familjes rrezikuan jetën duke udhëtuar me gomone drejt Italisë dhe më pas u vendosën si azilantë politikë në Belgjikë. Artistit i shpëtoi jeta falë ndihmës së deputetit Bujar Leskaj, ndërsa udhëtimi në det të hapur mbetet një kujtim i përjetshëm për të.

Në Belgjikë, reperi u përshtat me realitetin e ri, mësoi frëngjishten dhe mori pseudonimin “Stresi” nga nëna e tij, për natyrën energjike dhe rebele. Rikthimi në Shqipëri në vitin 2007 shënoi fillimin e karrierës së tij muzikore, duke publikuar projektet e para në platforma digjitale si MySpace. Njohja me kantautorin Flori Mumajesi u bë një pikë kthese, duke i dhënë një shtysë të jashtëzakonshme karrierës së tij.

Përsa i përket industrisë së muzikës dhe jetës luksoze që shfaqet shpesh në videoklipe, Stresi thekson se rreth 80% e saj është thjesht imazh dhe nuk pasqyron realitetin e artistëve. Madje, edhe ai në fillimet e tij huazonte sende luksi për të krijuar imazhin e duhur.

Tema e dashurisë u bë mjaft personale gjatë intervistës. Reperi foli për ish-partneren e tij, Keisin, duke e cilësuar si një vajzë të pavarur dhe të jashtëzakonshme, por theksoi se rikthimi në marrëdhënien e kaluar është i pamundur. Ai nënvizoi se, ndonëse asnjë vajzë tjetër nuk ka arritur të rivalizojë me standardin që ajo la pas, kapitulli i saj është mbyllur përfundimisht.

Ky rrëfim i hapur tregon një Stresi më të sinqertë dhe emocional, duke zbuluar sfidat, triumfet dhe jetën sentimentale që deri më tani kanë mbetur të pathëna për publikun.