Sheshi i Flamurit në Vlorë u mbush mbrëmjen e sotme me simpatizantë të Partisë Socialiste, në një aktivitet festiv pas takimit të Kryeministrit Edi Rama me banorët e Zvërnecit.

Gjatë tubimit, u raportua një incident mes punonjësve të sigurisë dhe një qytetareje që mbante një pankartë në mbështetje të protestës kundër investimit në Zvërnec. Sipas dëshmive në vendngjarje, punonjësit e sigurisë i kanë hequr dhe grisur pankartën, duke mos e lejuar qytetaren të vijojë me thirrjet e saj.

Ngjarja ka shkaktuar tension në shesh, mes pjesëmarrësve dhe forcave të sigurisë, në një moment kur në zonë po zhvillohej aktiviteti festiv i organizuar nga Partia Socialiste.

Qytetarja u shpreh e përlotur pas incidentit, duke deklaruar se nuk kishte bërë asgjë të paligjshme dhe se po i mohohej e drejta e shprehjes së mendimit të saj.